Unang Paneanghu Marhula Hula Dohot Martulang

Di sada botari martelepon ma si Ucok tu Tulangna Amani Lambas.

Ucok : "Halo Tulang, apa kbr ni, sehatnya tulang kan?
Iya nih Tulang,:  aku mau kasih tau dua bulan lagi aku mau menikah Lang. Kata Mama, sebelum menikah aku disuruh dulu ke rumah Tulang ngenalin calon Istriku.

Tapi, nggak apa-apa kan kalau aku nggak datang? Soalnya cutiku cuma seminggu sebelum pesta

Amani Lambas : "Dok jo annon Inongmu martelpon tu ahu da!" (huhut ditarik hosana).

Hira hira 15 menit, mangkuling ma HP na.
Hatop do diangkat ala diboto ibana ibotona do na martelepon i.

Amani Lambas : "Horas Ito boha kabar di bariba i, martelepon nangkin Bere i.
Didok ibana, naeng marhasohotan tar hira dua bulannai?".

Nai Ucok : "Horas ma tutu Ito, sehat-sehat do hami sude.Toho Ito, naeng marhasohotan ma beremi, na husuru do ibana martelep tu Ito. Ndang pola boha molo ndang sian jabu muna hami dohot beremi kan?
Mangantusi ma Ito, repot hian lao mangurus sude Godung, Katering, Baju, Salon, Musik, manang na asing nai. Ingkon nuaeng do bukkingon i jala leonon tanda jadina."
"Soal pasi Ulos dht Dekke SMS Ito ma rekeningmu ate!, togihon annon piga-piga angka hulahula i.

Ehh tahe Ito, mangido tolong jolo. Hamu ma tong pasahat Gonghon tu Tulangta ate. Ai so huboto didia jabuna, pajolo ma hepengmi baen parsidekke na.
Pittor huganti pe annon da!"

Amani Lambas : "Ito ingot hatanghon!
Naujui ditinggalhon Ho do kuliahmu, laho do Ho mangalua dohot Lae. Suda Tano Mahiang, suda Tano Maraek alani i. Jala ido umbahen marsahit Inong tingki i.
Denggan panatangmu, mar-bunibuni do Inong pasahat ulos mulagabe tu Ho jala marsipanganon do Ho dibahen Dainang, ima Dekke na ni lompana pabosurhon Ho" (mulai manetek ilu ni Ama ni Lambas)
"Di na mate pe Among, huapus do andoranghu. Marboha bahenon ma, hujalo do Adatmu di jolo ni bangke ni Damang. Asa sangap do Ho Ito rap dohot Simatuam.
Dung tolu ari Damang tapataru tu udeanna, ro ma Ho muse rap dohot Lae marnida tading-tading ni Damang i, asa adong Pauseang di hamu Boru marhite sipanganon na binoan muna i."
"Malengleng ateatenghu ku Ito, alai mengkel suping do ahu jala pintor hulehon do Ulos Na So Ra Burukhi songon tanda ni holongku tu hamu. Nuaeng pe naeng mangoli berenghi, ndang boi sangap Among di ngoluna dibahen Ito, pinomat sangap ahu dibahen berenghi. Pulut do roham Ito manungkun nomor rekeninghu jala ahu muse naeng suruonmu manggonghon Tulangta."
"Sambor ni nipinghi bahemonmu Ito.
Boha? Lewat Titipan Kilat ma hutongos Ulos dohot Dekkenghu? Soal hata pasupasu pangke Telekonperens pe hubahen. Ai holan modal pulsa do i.Transfer ma Tintin Marangkup i tu rekeninghu."
"Alai, Unang hansit roham molo mabalu Ho Ito, pangke Ojek Online ma hutongos Tujungmu!".

Nai Ucok : "#$@&+&$#$  (langsung pingsan).

Saotik sian panggurit, tu hita manang idia pe maringanan, unang palembahu  mar Tulang dohot mar Hula-hula Gabe pe na sinuan, sinur pe na pinahan, mangomo na martigatiga manang denggan karirta di karejo/pegawai. Ndang alani gogo manang malonta i sude. Ala ni asi ni Tuhanta do di hita jala tangiang dohot hata pasupasu sian Tulang dohot Hula-hulanta.

Molo tung adongpe na sarupa goar manang pardalanan ni ngoluna songot cerita diginjang, "Sampulu jarijari pasampulu sada simajujung marsantabi ahu tu hita saluhutna.

Horas!!! .Horas be ma sude..!!!

Anggo Hata pasu pasu niTulangi
Sambola Langit,hape pambaenanmu so adong.

Subscribe to receive free email updates: